a[Sai 25:22]

Psalms 80

Te Israel dabego gedu haluasa po weyu, te Godigo augwali tau selama, ma dolalumainu yali

1Te Israel dabe tonalubo bidi, nago te naga
sipsip dabe da bilibo dodolobo dao.
Te dago gela wabo odao.
Nage te ensel dabe daide
ugwadu king bidibo dao. a
 2Nago te Efraim dabe, me Benjamin dabe,
me te Manase hani bage augwali homu dene yao.
Nago te homu dene ebo
te pepeli diliba hanilama, pedalumainu ilao.
Te nago genuai bomo dabolo ola mayu,
tama aselama, da tau sagasobaso da,
teda da me dologobeo.
 3God, nago da selasa, te nagaba ma pao.
Nago te olo tau sabo wiegi yai kolesaga
dabolo eyu, tama da tau sobaso da,
teda da munu me hagagobeo.
 4Genuai Bidi, nage
te Tigidali Bomo Elalubo God dao,
nisu naga sogo digi te nago
naga we bidi dabego gedu haluasa po wabode te
wado po me nago elalu odaibawe?
 5Nago da te gela mu udumainu elama,
tama dena gedu ąį te tubo nai,
me te genuai tubo ąį tiwai ebao.
 6Nago te gasa hani we bidi dabe
te da pąba asomainu ilama,
te augwaligo dago tǫ sainu hwįbao.
Tama te boi bidi dabego dabolo
te posobo po weyu, gisugu mayu, ebo dao.

7Te Tigidali Bomo Elalubo God,
nago da edaba ma sao.
Nago te olo tau sabo wiegi yai kolesaga
dabolo eyu, tama da tau sobaso da,
te da me hagagobeo.

8Polobadu nago te ni wain deli te Isipdu selasa asali.
Tama nago gasa hani dabe te tǫde sela sąnama,
tama nago te ni wain te augwaligo tǫde bulai dao.
 9Nago aga tǫ delide peda selama, tama nago bulalio.
Aga holama, tama aga sele te aiyanu mu dulalio,
tama aga genuai mu holama,
tama te tigidali tǫ pedai mesega sai dao.
 10Tama te ni wain nologogo te tigidali bulu du me,
tama te moni dobo dwai ni sida dabe mesegelai dao.
 11Te aga nologo pali, te genuai tamu ąį
Mediterenian si, te dąį igi pelama,
tama giliga asobo badu me pali,
te wę Yufretisba usu nigi pai dao.
 12Tiali goli, magi baso nago
te wain gi bagulali obo dabe alualiwe?
Megi da, te sunumidu soabo we bidi dabe
augwaligo te wain gi du dabe wi saibao.
 13Tama te uni kibu dabego agayu,
tama te uni hasa dabego tubo dao.

14Te Tigidali Bomo Elalubo God,
nago daba homu kone ma palao.
Nage te dagalude bidiyu, tama nago daba aiya tonaluao.
Tama nage aselama, da tau sagasao,
da naga nago ni wain tiwai dao.
 15Nago da tau sagasao, naga digi nago
te naga bomogo da bulali.
Da te gesi ni wain tiwai nago
te bomonama mu pedalumainu yai dao.
 16Te dago boi bidi dabego togolama,
tama siaba ulalio.
Te nago augwaliba wado eyu, tama augwali mu dolao.
 17Tiali goli, nago da we bidi dabe tau sao,
nago te naga da weyu, sa munama,
tama da tonalubao.
Nago da genuai pedalumainu elama, tama bomo ilali.
 18Nago tama tibaso da,
teda dago nage ma tagalugobeo.
Nago da bugagia bidimainu eyu, tau sobaso da,
tama te nageba gedu haluasa po weyu,
tama nago nogi ugwaba saibao.
 19Genuai Bidi, nage te Tigidali Bomo Elalubo God dao,
nago da te nagaba ma sao.
Nago te olo tau mabo
wiegi yai kolesaga dabolo eyu,
te da tau sao, te da me hagagobeo.
Copyright information for MPS